Վրաստանի հատուկ քննչական ծառայությունը հետաքննություն է անցկացնում Թբիլիսիում «օտարերկրյա գործակալների» օրենքի դեմ բողոքի խաղաղ ցույցի մասնակիցների նկատմամբ անհամաչափ ուժի գործադրմամբ պաշտոնական լիազորությունների հնարավոր չարաշահման փաստով, հայտնում է Грузия Online-ը։
Գործակալությունը միջադեպերի մասին հաղորդումներ է ստանում թեժ գծի միջոցով՝ ժամանակավոր պահման վայրերից և հանրային պաշտպանի գրասենյակից, ինչպես նաև իրականացնում է քննչական գործողություններ։
Հատուկ քննչական ծառայությունը խոստացել է հանրությանը տեղեկացնել նախաքննության ընթացքի և արդյունքների մասին։
Չորեքշաբթի գիշերը վրացական հատուկ ջոկատայինները փորձել են բռնությամբ ցրել Թբիլիսիում «օտարերկրյա գործակալների» օրենքի դեմ խաղաղ ցույցի մասնակիցներին, որից հետո նրանք նահանջել են։
Վրաստանի խորհրդարանի շենքի մոտ ցուցարարներին ցրելու նպատակով ոստիկանները արցունքաբեր գազ և ջրցան մեքենաներ են կիրառել, սակայն ցուցարարները հրաժարվել են հեռանալ Ռուսթավելի պողոտայից։
Նախորդ գիշեր վրացի իրավապահները պղպեղ են ցողել առնվազն տասը մարդու, ովքեր մասնակցում էին Թբիլիսիում «Օտարերկրյա ազդեցության թափանցիկության մասին» օրինագծի ընդունման դեմ բողոքի ակցիային։
Հիշեցնենք, որ Վրաստանի խորհրդարանի իրավական հանձնաժողովը ապրիլի 29-ին երկրորդ ընթերցմամբ աջակցել է օրինագծին։ Դրա քննարկումը Վրաստանի խորհրդարանի լիագումար նիստում կարող է շարունակվել եւս մի քանի օր։
