Ադրբեջանի նախագահ Իլհամ Ալիեւը կարծում է, որ Բաքուն եւ Երեւանը երկու երկրների միջեւ հարաբերությունների կարգավորման գործընթացում կարող են շփվել առանց միջնորդների։ Այս մասին նա հայտնել է՝ ելույթ ունենալով Բաքվում «Երկխոսություն հանուն խաղաղության եւ գլոբալ անվտանգության» թեմայով միջմշակութային երկխոսության VI համաշխարհային համաժողովում, տեղեկացրել է ՏԱՍՍ-ը։
«Սկսվել է սահմանների սահմանազատումը, անգամ սահմանագծման աշխատանքներ են կատարվում։ <...> Մեր երկու երկրներին [Ադրբեջանին եւ Հայաստանին] հաջողվել է հասնել դրան առանց որեւէ միջնորդի։ Դա մեկ անգամ եւս ցույց է տալիս, որ մեզ միջնորդներ պետք չեն, հատկապես նրանք, ովքեր հետապնդում են իրենց նպատակները, չեն ցանկանում օգնել, այլ ցանկանում են խառնվել մեր տարածաշրջանին հանուն իրենց քաղաքական եւ տնտեսական շահերի ձեռքբերման։ Նրանք միայն ցանկանում են նորից յուղ լցնել կրակին»,- ասել է Ալիեւը։ Ադրբեջանի նախագահն ընդգծել է, որ իր երկիրը թույլ չի տա հերթական հակամարտության բորբոքում Հարավային Կովկասում։ «Երեսնամյա դիմակայությունից հետո Ադրբեջանը եւ Հայաստանը հստակ հասկանում են, որ ցանկանում են խաղաղություն Հարավային Կովկասում։ Իսկ նման խաղաղության հասնել կարելի է միայն Ադրբեջանի եւ Հայաստանի միջեւ հարաբերությունների կարգավորման ճանապարհով»,- նշել է նա։
Հիշեցնենք, որ «խաղաղության» մասին խոսում է այն պետության ղեկավարը, որի ուղիղ ցուցումով իրականացվեցին էթնիկ զտումները Լեռնային Ղարաբաղում, տեղահանվեց ավելի քան 140 հազար էթնիկ հայ, «գործողության» ընթացքում զոհվեցին խաղաղապահներ, Ադրբեջանն առ այսօր օկուպացված է պահում Հայաստանի 200 քառակուսի կիլոմետր ինքնիշխան տարածք, եւ Ադրբեջանը շարունակում է տարածքային պահանջներ ներկայացնել ՀՀ-ին, շարունակում է գերության մեջ պահել տասնյակ հայերի, այդ թվում Լեռնային Ղարաբաղի նախկին ռազմաքաղաքական ղեկավարությանը։