ԼՂ հակամարտության վերաբերյալ մեր դիրքորոշումը շատ պարզ է. այն հիմնվում է Արցախի ժողովրդի՝ իր հայրենիքում ապրելու անառարկելի իրավունքի վրա: Այս մասին, այսօր՝ մայիսի 1-ին, «Նոր ուժ» կուսակցության հիմնադիր համագումարում իր ելույթում նշեց Երեւանի նախկին քաղաքապետ Հայկ Մարությանը:
«Ուժի եւ ուժի կիրառման սպառնալիքի կիրառմամբ եւ էթնիկ զտումների միջոցով հնարավոր չէ չեղարկել Արցախի հայության իրավունքները: Արցախցիները իրենց հազարամյա հայերնիքում ապրելու եւ արարելու հնարավորություն պետք է ունենան»,-ասաց նա:
Նա խոսեց նաեւ Տավուշում ընթացող իրադարձությունների մասին. «Իհարկե, մեծ է գայթակղությունը ասելու, որ մենք պետք է աննահանջ լինենք եւ կռիվ տանք յուրաքանչյուր մետրի եւ դիրքի համար:Կարծում եմ, հատկապես Արցախի աղետից հետո մենք պետք է ավելի զգույշ լինենք բառերի ընտրության հարցում: Մենք տեսանք, թե ինչ աղետի բերեց իշխանությունների առավելապաշտությունն ու պոպուլիզմը, երբ այդ նույն մարդիկ, որոնք այսօր հրաժարվում են անգամ «Արցախ» բառն օգտագործելուց, այն ժամանակ հայտրարում էին, որ Արցախը Հայաստան է եւ վերջ: Պետք է դուրս գալ պոպուլիզմի եւ ականջահաճո ճառերի շրջափուլից: Կապ չունի, որ մենք այսօր ընդդիմություն ենք: Մենք պետք է մեր խոսքը կառուցենք ամենայն պատասխանատվությամբ:
Հետեւաբար, երբ կարծիք են հարցնում Տավուշի դեպքերի վերաբերյալ, ես ասում եմ, որ բովանդակային կարծիք կազմելու համար ես պետք է տիրապետեմ բանակցային բոլոր մանրամասնություններին, իսկ մենք բնականաբար, նման տեղեկատվության չենք տիրապետում:
Բայց մենք մի բան հաստատ գիտենք՝ այն իշխանությունը, որ այս տարիների ընթացքում հազար ու մի սահման է խախտել, հազարումի խոստումից հետ է կանգնել, այն իշխանությունը, որ խոսք է տվել Արցախի անկախության երաշխավորում, հետո խոսք է տվել, որ նշաձողի իջեցման պարագայում կկարողանա արցախցիների անվտանգությունն ապահովել, հետո հրժարվել է անգամ Արցախ բառից, այս իշխանությունն այլեւս կորցրել է Հայաստանի ճակատագրին վերաբերող հարցերով զբաղվելու լեգիտիմ իրավունքը»,- ընդգծեց Մարությանը:
Նշենք, որ «թավշյա հեղափոխությունից» հետո Հայկ Մարությանը «Քաղաքացիական պայմանագրի» ցուցակով ընտրվել էր Երևանի քաղաքապետ, ապա 2021-ի դեկտեմբերին պաշտոնանկ էր արվել իր թիմի կողմից։ Քաղաքապետին անվստահություն հայտնելու գործընթացն իշխող թիմը հիմնավորել էր նրա հետ քաղաքական խզմամբ։ Այս տարվա փետրվարի 7-ին էլ Երևանի ավագանին դադարեցրել էր «Ազգային առաջընթաց» կուսակցության ցուցակով ավագանու անդամ դարձած Մարությանի լիազորությունները՝ բացակայություների հիմնավորմամբ։
«Նոր ուժ» ռեֆորմիստական կուսակցության նպատակը հանրաքվեներին, պետական և տեղական ինքնակառավարման մարմինների ընտրություններին մասնակցելու և հասարակության ու պետության քաղաքական կյանքին մասնակցության այլ ձևերով ժողովրդի քաղաքական կամքի ձևավորմանն ու արտահայտմանը նպաստելն է:
«Նոր ուժ» կուսակցության գաղափարական հենքը սոցիալ-ռեֆորմիզմն է։