Բաքվում մայիսի 1-ին բացվել է «արեւմտյան Ադրբեջանի հեռուստատեսության» շենքը համանուն համայնքում։ Այս մասին տեղեկացրել է Oxu.Az-ը։
Հիշեցնենք, որ Ադրբեջանում «արեւմտյան Ադրբեջան» ասելով նկատի ունեն ներկայիս Հայաստանի ՈՂՋ տարածքը։ Այսպիսով, «արեւմտյան Ադրբեջանի համայնք» անհեթեթ կառույցին ավելացել է էլ ավելի հզոր ֆեյք տեղեկատվության եւ քարոզչության աղբյուր։
Դա շենքի բացման արարողության ժամանակ հաստատել է «համայնքի» վարչության նախագահ, պատգամավոր Ազիզ Ալեքբերլին։ Նրա խոսքով՝ հեռուստաալիքը «հետապնդում է հայրենի հողերից վերջին 200 տարիներին ադրբեջանցիների տեղահանման եւ Արեւմտյան Ադրբեջանում ադրբեջանական ժառանգության ոչնչացման մասին ճշմարտությունը։ Հեռուստաալիքը ակտիվորեն պաշտպանելու է բնիկ հողեր ադրբեջանցիների խաղաղ եւ անվտանգ վերադարձի ապահովմանն ուղղված ջանքերը»։ Նրա խոսքով՝ շենքն ունի բոլոր անհրաժեշտ պայմանները հեռուստատեսային գործունեության համար։
Հեռուստաալիքը եթեր դուրս կգա շաբաթը վեց անգամ երկու ժամով, երեք անգամ ադրբեջաներեն եւ երեք անգամ՝ ռուսերեն։ Բացի այդ, շաբաթվա ընթացքում եթեր դուրս կգա կեսժամյա տեսություն անգլերեն։
Հեռուստաալիքի բացմամբ Բաքվում հաստատել են Հայաստանի հանդեպ տարածքային հավակնություններ ունենալու գիծը։