Ֆրանսիայի Եվրոպայի հարցերով նախարար Ժան-Նոել Բարոն հայտնել է, որ Եվրամիության գրեթե բոլոր պետությունները ինտերնետում թիրախ են ռուսամետ քարոզչության համար, Եվրախորհրդարանի ընտրությունների նախօրեին, որոնք կայանալու են հունիսին։ Այս մասին տեղեկացրել է Bloomberg-ը։

Գերմանացի եւ լեհ գործընկերների հետ համատեղ մամուլի ասուլիսում ելույթ ունենալով՝ նա նշել է, որ Ֆրանսիայի կառավարության ջանքերը՝ ուղղված օտարերկրյա միջամտության եւ ապատեղեկատվության դեմ պայքարին, հայտնաբերել են 31 նոր կայք, որոնք տարածում են կրեմլամետ քարոզչություն ամբողջ Եվրոպայում։

Ֆրանսիայի արտաքին գործերի նախարարությունը երկուշաբթի տեղեկացրել էր, որ ԵՄ 27 անդամ երկրներից 25-ը վերջին ամիսներին դարձել է թիրախ ռուսական քարոզչության համար։

Բարոն սոցիալական պլատֆորմներին կոչ է արել փակել այն կայքերը, որոնք «մասնակցում են օտարերկրյա միջամտության գործողությանը»։ Նրա խոսքով՝ այդ ինտերնետ-գործողություններն ուղղված են հանրային կարծիքի ապակայունացմանը ընտրությունների նախաշեմին։

«2024-ը մեծ ընտրությունների տարի է Եվրոպայում եւ նրա սահմաններից դուրս։ Մենք չենք հանդուրժի մեր դեմոկրատական գործընթացներին միջամտելու ոչ մի փորձ»,- նշված է երեք նախարարների համատեղ հայտարարությունում։