Քանի դեռ Բաքվի հետ բանակցություններն ընթանում են առանց միջնորդների, Ադրբեջանը կարող է հարձակվել։ Այս մասին NEWS.am-ի թղթակցի հետ զրույցում ասել է քաղաքագետ Ալեն Ղեւոնդյանը։
Նա համոզմունք է հայտնել, որ եթե բանակցություններին միջնորդ միանա, ապա կարող են երաշխիքներ ստեղծվել, որ իրավիճակն այլ կլինի։
Տավուշում տեղի ունեցողը փորձագետն անվանել է անլեգալ եւ ոչ լեգիտիմ, Հայաստանի վրա Ադրբեջանի ճնշման արդյունք։ «Իրենց իսկ հայտարարությունների համաձայն՝ այդ հանձնաժողովները ոչ լեգտիմ են եւ ոչ լեգալ, քանի որ չի մշակված կանոնակարգ, դրանց լիազորությունների եւ պատասխանատվության աստիճանը սահմանված չէ։ Ընդհանուր առմամբ, Հայաստանի տարածքների հարցերը չեն կարող մտնել այդ հանձնաժողովների լիազորությունների մեջ»,- ավելացրել է Ղեւոնդյանը։
Նրա գնահատմամբ՝ Ադրբեջանի նախագահ Ալիեւը շտապում է, իսկ այսպես կոչված սահմանազատման եւ սահմանագծման մասով պահանջների բավարարումից հետո առաջ կքաշի նոր պահանջներ, իսկ Հայաստանի իշխանությունները կշարունակեն իրենց իրականացրած քաղաքականությունը։ «Հաջորդ պահանջը կապված կլինի ադրբեջանցիների բնակեցման հետ Հայաստանի կոնկրետ վայրերում, կոնկրետ քանակներով։ Անցած տարվա դրությամբ ավելի քան 100 հազար ադրբեջանցիներ են գրանցվել՝ հայտնելով, որ իրենք Հայաստանում սեփականություն ունեն»,- նշել է փորձագետը։
Նա չի բացառել, որ կարող է առաջադրվել նաեւ հաղորդակցությունների օրակարգ, որի իրականացումը կարող է տեղի ունենալ նաեւ Տավուշից դեպի Թուրքիայի սահման։ «Ալիեւը միշտ խոսել է ոչ միայն Սյունիքի միջանցքի մասին, նա խոսել է մի քանի ճանապարհների մասին»,- ընդգծել է Ալեն Ղեւոնդյանը։
