Սա ժողովրդային շարժում է, ով ինչպես ուզում է՝ արտահայտվում է. կարող են, օրինակ, նստել, հաց չուտել, ասել՝ այսպես մեր անհամաձայնությունն ենք հայտնում այս գործընթացին: Այս մասին այսօր՝ ապրիլի 29-ին, Կիրանցում NEWS.am-ի հետ զրույցում նշեց Տավուշի թեմի առաջնորդ Բագրատ Սրբազանը:
«Ուրախ եմ, որ տարբեր միավորումներ, կազմակերպություններ, անհատներ արձագանքել են ոչ թե իմ խոսքին անպայման, այլ արձագանքելն են այս մարդկանց աղաղակին: Երբ միասնության մասին եք խոսում, դա կեղծ միավորումներով չի լինում: Լինում է նպատակի, գաղափարի շուրջ»,-ասաց նա:
Սրբազանի խոսքով, իշխանությունների ամբողջ ջանքը եղել է քաոս ստեղծել երկրում, բաժանել, պառակտել. «Ընտանիք չկա, որ իրար հետ թշնամի չեն մարդիկ, ընտանիք չկա, որ մարդը չի կարողանում իր ցավն արտահայտել որեւէ կերպով, որովհետեւ հանկարծ եղբայրը, քույրը, ամուսինը, կինը, երեխաները կսկսեն թշնամանալ, հակառակվել: Ամեն տեղ է այսպես:
Այս գյուղերում մարդիկ ապրել են տարբերություններով, հազար ու մի խնդիրներ են ունեցել, կռիվներ, վեճեր, բաժանումներ, բայց մեկ բան են ունեցել, որ բոլորն այդ գաղափարով նույնն են եղել՝ դա սահմանն է, սահմանապահ լինելու կոչումը: Այդ հարցում ոչ ոք տարբեր չի եղել՝ լինի Կիրանցում, Բաղանիսում, Ոսկեպարում, Բերքաբերում, Կոթիում մինչեւ Չինարի:
Հիմա էս մարդիկ եկել են, սահմանն էլ են բաժանում: Գյուղում 10 հոգի կարող է դեմ լինել զիջումների ծրագրին, 10 հոգի՝ դեմ: Հիմա դուք պատկերացնո՞ւմ եք այդ թշնամությունը: Դավաճան, հողատու եւ այլ պիտակներ: Գյուղի միակ պատվարը միասին լինելու, որը երբեք չի խախտվել, հիմա ի՞նչ է տեղի ունենալու, թշնամություն»,-ասաց Բագրատ Սրբազանը:
Հիշեցնենք, որ Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը:
ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:
Տավուշի սահմանամերձ գյուղերի բնակիչներն ապրիլի 19-ից բողոքի ակցիաներ են անում Հայաստան-Վրաստան միջպետական ճանապարհին: Նրանք դեմ են սահմանազատման այն տարբերակին, որը համաձայնեցրել են Երևանն ու Բաքուն։
