Գերմանիայի կանցլեր Օլաֆ Շոլցն այսօր ընդունել է Ադրբեջանի նախագահ Իլհամ Ալիեւին։
Ալիևը Բեռլինում է՝ մասնակցելու «15-րդ Պետերբերգի կլիմայի երկխոսություն» բարձր մակարդակի սեգմենտի հանդիպմանը։
Այցի ընթացքում տեղի են ունեցել դեմ առ դեմ և ընդլայնված կազմով հանդիպումներ, որոնք ավարտվել են համատեղ մամուլի ասուլիսով։
«Մեր նավթի և գազի պաշարների կարիքը, այդ թվում՝ եվրոպական շուկաներում, դեռ երկար տարիներ կլինի», - ասել է Ալիևը։ Հիշելով 2022 թվականին ԵՄ-ի հետ էներգետիկ ոլորտում գործընկերության համաձայնագրի ստորագրումը, Ալիևն ասել է, որ այսօր ավելանում են ադրբեջանական գազի մատակարարումները Եվրամիություն։ Նրա խոսքով, Եվրոպայում աճում է բնական գազի՝ նոր աղբյուրներից ստացվող գազի պահանջարկը։ «Եթե 2021 թվականին մենք 8 միլիարդ խորանարդ մետր գազ ենք մատակարարել Եվրամիության երկրներին, ապա այս տարի այդ թիվը հասել է 12 միլիարդի։ Մենք լրացուցիչ ներդրումներ ենք կատարում և լրացուցիչ միջոցներ ենք հատկացնում այդ հարցում եվրոպական երկրներին աջակցելու համար»,- նշել է Ալիևը։ «Հետևաբար, Ադրբեջանը, որը հարուստ է ինչպես ավանդական էներգիայով, այնպես էլ վերականգնվող էներգիայով, երկար տարիներ կշարունակի մնալ Եվրոպայի կարևոր գործընկերը»:
«Ես շնորհակալություն եմ հայտնում Ադրբեջանին էներգետիկ կայունության մեջ ունեցած ներդրման համար»,- ի պատասխան ասել է Օլաֆ Շոլցը։ Նա նշել է, որ կարևոր է նաև, որ ածխաջրածիններ արտադրող երկրները նվազեցնեն այդ վառելիքի օգտագործումը. «Սա մեզ որոշակի հնարավորություններ է տալիս։ COP28-ը հաջողություն էր, և ես հավատում եմ Բաքվում հաջող COP29-ի անցկացմանը»:
Հիշեցնենք, որ 2022 թվականի օգոստոսին Եվրահանձնաժողովի նախագահ Ուրսուլա ֆոն դեր Լեյենն անձամբ էր մեկնել Բաքու՝ ստորագրելու էներգետիկ գործընկերության խորացման մասին հուշագիրը, որտեղ Ադրբեջանն անվանել է «հուսալի և վստահելի գործընկեր»։ Արդեն Լեռնային Ղարաբաղի շրջափակման ժամանակ Ադրբեջանը, Վրաստանը, Ռումինիան և Հունգարիան համաձայնագիր են ստորագրել ադրբեջանական էլեկտրաէներգիայի մատակարարման մասին։ Ստորագրմանը ներկա է եղել Եվրահանձնաժողովի նախագահ Ուրսուլա ֆոն դեր Լեյենը, ով այնտեղ ողջունել է Ալիևին։
Եվրոպացի պաշտոնյաների նման պահվածքը դժվար է որակել որպես այլ բան, քան օրհնություն հետագա անպատիժ հանցագործությունների համար։ Իհարկե էներգետիկ ռեսուրսների դիմաց դիմաց։
