Փարիզի հայտնի «Մուլեն Ռուժ» («Կարմիր ջրաղաց») կաբարեի ջրաղացի թևերը փլուզվել են ապրիլի 25-ի գիշերը, միջադեպի հետևանքով ոչ ոք չի տուժել։ Այս մասին հայտնում է BFMTV-ը՝ Փարիզի հրշեջներին հղումով։
Հաղորդվում է, որ գիշերվա ժամը երկու-երեքի սահմաններում թևերն ընկել են ճանապարհի երթևեկելի հատվածում։ Հեռուստաալիքը նշում է, որ ընկած թևերը հարվածել են կաբարեի անունով ցուցանակին։ Արդյունքում մի քանի տառ ընկել է գետնին։
Դեպքի վայր են ժամանել հրշեջներն ու ոստիկանությունը։ Այս պահին հետագա փլուզման վտանգ չկա։ Դեպքի վայրի շուրջ անվտանգության պարագիծ է սահմանվել, և ժամը 8։00-ի սահմաններում մասնագետները հեռացրել են ջրաղացի փլված թևերը։ Տեղի ունեցածի պատճառն առայժմ անհայտ է։
Ֆրանսիական ամենահին կաբարեն՝ «Մուլեն Ռուժը», առաջին անգամ բացել է իր դռները 1889 թվականի հոկտեմբերի 6-ին և հանդիսանում է Ֆրանսիայի մայրաքաղաքի տեսարժան վայրերից մեկը։ Կաբարեի շենքը գտնվում է Մոնմարտրի ստորոտին։ Այն ջրաղացի տեսք ունի, որն արտացոլված է հենց հաստատության անվանման մեջ, որը թարգմանաբար նշանակում է «Կարմիր ջրաղաց»։ Թևերի կարմիր գույնը խորհրդանշում է զվարճանք և ակնարկում կարմիր լապտերների թաղամասը: