Առնվազն 16 մարդ է զոհվել, ևս 28-ը՝ անհետ կորել Ջիբութիի ափերի մոտ՝ Աֆրիկայի եղջյուրում, 77 ներգաղթյալ տեղափոխող նավի խորտակման հետևանքով: Դրա մասին երեքշաբթի հայտնել է ՄԱԿ-ի միգրացիոն գործակալությունը X-ի միկրոբլոգում՝ հավելելով, որ կազմակերպության տեղի գրասենյակը որոնողափրկարարական աշխատանքներում աջակցում է տեղական իշխանություններին:
Գործակալության խոսնակ Իվոն Նդեգեն Ֆրանսպրեսին հայտնել է, որ 16 զոհվածների թվում կան երեխաներ և մի նորածին:
Նավը խորտակվել է մոտ երկու շաբաթ անց, երբ եթովպացի ներգաղթյալներ տեղափոխող մեկ այլ նավ էր խորտակվել Ջիբութիի ափերի մոտ, ինչի հետևանքով տասնյակ մարդիկ էին զոհվել:
Ջիբութիում Եթովպիայի դեսպան Բերհանու Ցեգայեն հայտնել է, որ նավը Եմենից եթովպացի ներգաղթյալներ էր տեղափոխում, և որ վթարը տեղի է ունեցել երկուշաբթի երեկոյան Ջիբութիի հյուսիս-արևելյան Գոդորիա կղզու մոտ։ Նա նշել է, որ ողջ է մնացել 33 մարդ, որոնցից մեկը կին է։