Հունաստանը և Իսպանիան ԵՄ-ի և ՆԱՏՕ-ի դաշնակիցների ինտենսիվ ճնշման տակ են՝ Ուկրաինային հակաօդային պաշտպանության ավելի շատ համակարգեր տրամադրելու համար: Ըստ Financial Times-ի՝ հարցը երկուշաբթի քննարկվել է Լյուքսեմբուրգում ԵՄ արտաքին գործերի և պաշտպանության նախարարների հանդիպմանը։

Ուկրաինայի էներգետիկ ենթակառուցվածքի վրա ռուսական հարձակումների ուժգնացման ֆոնին Կիևն ավելի վաղ դիմել էր արևմտյան դաշնակիցներին՝ յոթ լրացուցիչ հակաօդային պաշտպանության համակարգեր, մասնավորապես, ամերիկյան Patriot կամ խորհրդային S-300 անհապաղ տրամադրելու խնդրանքով: Առայժմ միայն Գերմանիան է հայտարարել մեկ Patriot համակարգի առաքման մասին (որը մոտ ապագայում կհասցվի Ուկրաինա) և այլ երկրներին հորդորել է լրացուցիչ համակարգեր տրամադրել։

ԵՄ առաջնորդներն անցյալ շաբաթ Բրյուսելի գագաթնաժողովն օգտագործել են՝ Իսպանիայի և Հունաստանի վարչապետներին անձամբ հորդորելու համար, որ իրենց համակարգերից մի քանիսը փոխանցեն Ուկրաինային: Հաշվի առնելով Patriot ունեցող Լեհաստանի և Ռումինիայի ավելի խոցելի դիրքերը՝ Կիևին մատակարարելու հարցով նրանք նվազ ճնշման են ենթարկվում:

Ըստ Reuters-ի՝ ի պատասխան Լեհաստանի կողմից Ուկրաինային Patriot համակարգեր տրամադրելու նախաձեռնությանը միանալու հնարավորության վերաբերյալ լրագրողների հարցին՝ վարչապետ Դոնալդ Տուսկն ասել է, թե դա անհնար է, բայց կան այլ տեսակի զենքեր, որոնք օգնում են պաշտպանել երկինքը, և Լեհաստանը ակտիվ կլինի այդ հարցում։