Ակնկալվում է, որ ԱՄՆ պետքարտուղար Էնթոնի Բլինքենը մի քանի օրվա ընթացքում կհայտարարի Իսրայելի պաշտպանության բանակի (ՑԱԽԱԼ) «Նեցախ Յեհուդա» գումարտակի դեմ պատժամիջոցների մասին՝ օկուպացված Արևմտյան ափում մարդու իրավունքների խախտումների պատճառով, հաղորդում է Axios-ը՝ հղում անելով իրազեկ աղբյուրներին:

Նշվում է, որ սա կլինի առաջին դեպքը, երբ ԱՄՆ-ն պատժամիջոցներ կկիրառի իսրայելական զորամիավորման դեմ։

Ըստ աղբյուրների, պատժամիջոցները կարգելեն գումարտակին և նրա անդամներին ԱՄՆ-ից  ռազմական որևէ օգնություն կամ ուսուցում ստանալ:

Ամերիկացի պաշտոնյան հայտարարել է, որ «Նեցախ Յեհուդա» ստորաբաժանման վերաբերյալ Բլինքենի եզրակացությունը հիմնված է Իսրայելի վրա ՀԱՄԱՍ-ի հոկտեմբերի 7-ի հարձակումից առաջ տեղի ունեցած միջադեպերի վրա, որոնք բոլորը տեղի են ունեցել Արևմտյան ափում:

«Նեցախ Յեհուդա» գումարտակը ստեղծվել է որպես ուլտրաօրթոդոքսալ զինվորների հատուկ ստորաբաժանում: Նրա բոլոր անդամները տղամարդիկ են։

Տարիների ընթացքում Արևմտյան ափում տեղակայված ստորաբաժանումը դարձել է բազմաթիվ «լեռնցի տղաների»՝ արմատական ​​աջ մտայնությամբ երիտասարդ վերաբնակիչների նշանակման վայր, որոնք չէին ընդգրկվել ՑԱԽԱԼ-ի որևէ այլ մարտական ​​ստորաբաժանման մեջ:

ԱՄՆ Պետդեպարտամենտը սկսել է հետաքննել «Նեցախ Յեհուդա» գումարտակի գործունեությունը 2022 թվականի վերջին այն բանից հետո, երբ նրա զինվորները ներգրավված են եղել պաղեստինցի խաղաղ բնակիչների դեմ բռնության մի քանի միջադեպերում, այն ժամանակ տեղեկացրել էր  Haaretz-ը:

 2023 թվականի հունվարին գումարտակը Արևմտյան ափից տեղափոխվել է Գոլանի բարձունքներ։ Այն ժամանակ հաղորդվում էր, որ որոշումն ընդունվել է պաղեստինցի խաղաղ բնակիչների նկատմամբ գումարտակի զինվորների բռնության կիրառման բազմաթիվ միջադեպերի արդյունքում։

«Իսրայելի պաշտպանության բանակի նկատմամբ չպետք է պատժամիջոցներ մտցվեն»,-  իր միկրոբլոգում հայտարարել է Իսրայելի վարչապետ Բենիամին Նաթանյահուն։

Նա հավելել է, որ այդ միջոցները կիրառելու մտադրությունն «այն ժամանակ, երբ Իսրայելի պաշտպանության բանակը կռվում է ՀԱՄԱՍ-ի դեմ, անհեթեթության և բարոյական անկման գագաթնակետն է», և որ իր կառավարությունը «իր ողջ ուժով կհակազդի այդ քայլերին»։