Գերմանացի միլիարդատեր Կառլ-Էրիվան Հաուբը, որն անհետացել էր 2018-ին և այդ ժամանակից ի վեր համարվում էր մահացած, հնարավոր է, որ ապրում է իր ռուս ընկերուհու հետ Մոսկվայում, հայտնում է գերմանական RTL հեռուստաընկերությունը՝ հիմնվելով սեփական հետաքննության արդյունքների վրա, որոնք ներկայացված են ֆիլմում։
Հաուբն անհետացել էր Ալպերում դահուկներով սահելիս, սկսվել էին որոնողական աշխատանքներ, որոնք տևել էին վեց օր, սակայն 58-ամյա գործարարի մարմինը չէր գտնվել։ Նա գերմանական Tengelmann Group սուպերմարկետների ցանցի ղեկավարն ու համասեփականատերն էր։ 2018 թվականի դրությամբ նրա կարողությունը Forbes-ի կողմից գնահատվում էր 6,4 միլիարդ դոլար, և նա ամենահարուստ գերմանացիներից մեկն էր։ Ուներ կին և երկու երեխա։
Հրապարակման մեջ ենթադրություն է հայտնվում, որ միլիարդատիրոջ եղբայրը՝ Քրիստիան Հաուբը, գիտեր գործարարի մահվան բեմադրության մասին, սակայն չէր ասում ճշմարտությունը։ Եղբոր անհետացումից հետո նա նրա տեղը զբաղեցրեց ընկերության ղեկավարության մեջ և անվտանգության ծառայությանը հանձնարարեց կասեցնել միլիարդատիրոջ հետ կատարվածի այլընտրանքային տարբերակներ բովանդակող լուրերը։ RTL-ի նյութի հրապարակումից անմիջապես հետո Քյոլնի դատախազությունը հետաքննություն է սկսել անհետացած միլիարդատիրոջ եղբոր դեմ։
Անհետանալուց երեք օր առաջ միլիարդատերը 13 անգամ զանգահարել է 44-ամյա ռուս կնոջ՝ Վերոնիկա Երմոլովայի համարին, խոսակցություններից մեկը տևել է ավելի քան մեկ ժամ։ Լրագրողները պարզել են, որ Հաուբն ու Երմոլովան տարբեր տարիներին միաժամանակ գտնվել են Մոսկվայում, Սոչիում և այլ քաղաքներում, իսկ 2009թ. մայիսին նրանք նույն գիշերային գնացքով են ուղևորվել Մոսկվա-Սանկտ Պետերբուրգ երթուղով, բայց տարբեր կուպեներով։
Կինն այն ժամանակ Սանկտ Պետերբուրգում զբոսաշրջային գործակալություն էր ղեկավարում և սիրում էր արշավներ և ժայռամագլցումներ, պատմում է Daily Mail-ը հետաքննող ֆիլմի բովանդակությունը։ Երմոլովան ներկայումս ճամփորդական ծառայություններ մատուցող Russian Event ընկերության մարքեթինգի տնօրենն է:
Անցյալ տարվա մայիսին Stern-ը հրապարակել էր Հաուբի լուսանկարները, որոնք, ինչպես պնդում են, արվել են Մոսկվայում 2021 թվականին: Պարբերականը նշել է, որ լուսանկարում տղամարդու նմանությունը Հաուբի հետ կազմում է մոտ 90%:
