Մենք էական բարեփոխումներ ենք անցկացրել, իսկ սեպտեմբերից դպրոցներում հոգեբանի պարտադիր հաստիք է գործում։ Ապրիլի 16-ին բնակչության հոգեկան առողջության ամրապնդմանն ուղղված եռամյա ծրագրի մեկնարկին նվիրված քննարկման ժամանակ հայտարարել է Հայաստանի կրթության, գիտության, մշակույթի և սպորտի նախարար Ժաննա Անդրեասյանը։
Ըստ նախարարի՝ սա վկայում է նրա մասին, որ մասնագիտական ռեսուրսները հասել են յուրաքանչյուր դպրոց:
Անդրեասյանը հավելել է, թե պետք է հոգեբաններին օգնել և նրանց անհրաժեշտ գիտելիքներով և հմտություններով զինել, որպեսզի նրանք զգոն լինեն և նկատեն խնդիրներ, որոնց բացահայտումն ավելի ուշ փուլում կարող է ճակատագրական նշանակություն ունենալ:
Նախարարը կարևորել է մասնագիտացված կառույցների դերը։ Նա գոհունակություն է հայտնել, որ ծրագիրը նաև այս հաստատությունների հետ աշխատանք է ներառում։
«Մենք առանձին գումար ենք հատկացնում «խելացի» հարմարություններին և ծառայություններին, որոնք չեն կարող բաշխվել և ծախսվել այլ նպատակների համար: Կարևոր է բացահայտել, թե ուսումնական գործընթացն արդյունավետ կազմակերպելու համար ինչ հարմարություններ են անհրաժեշտ»,- եզրափակել է Անդրեասյանը։
