Չինաստանի նախագահ Սի Ծինփինը Պեկինում հանդիպում է ունեցել Գերմանիայի կանցլեր Օլաֆ Շոլցի հետ։ Զրույցի ընթացքում, ի թիվս այլ հարցերի, մտքեր են փոխանակվել Ուկրաինայում ռազմական հակամարտության և դրա լուծման մեթոդների շուրջ։ Երկու կողմերն էլ հայտարարել են իրենց հավատարմությունը ՄԱԿ-ի կանոնադրության սկզբունքներին և միջուկային զենքի կիրառման կամ միջուկային օբյեկտների վրա հարձակումների կանխմանը: Սի Ծինփինը նաև չորս սկզբունք է ձևակերպել, որոնց հիման վրա, Չինաստանի կարծիքով, անհրաժեշտ է մոտենալ հակամարտության կարգավորմանը։
Սի Ծինփինն ընդգծել է, որ ստեղծված իրավիճակում անհրաժեշտ է կանխել հակամարտության սրումը կամ վերահսկողությունից դուրս գալը։ Այդ նպատակով նա առաջարկել է հավատարիմ մնալ հետևյալ սկզբունքներին՝ կենտրոնանալ խաղաղության հասնելու և եսասիրական շահեր չհետապնդելու վրա, աշխատել իրավիճակի դեէսկալացիայի ուղղությամբ և «կրակի վրա յուղ չլցնել», պայմաններ ստեղծել խաղաղ բանակցությունների համար և խուսափել հակամարտությունների հետագա սրումից՝ նվազագույնի հասցնելով հակամարտության բացասական ազդեցությունը համաշխարհային տնտեսության վրա և չխաթարել համաշխարհային արդյունաբերական մատակարարման շղթաների կայունությունը:
«Չինաստանն աջակցում է ճգնաժամի խաղաղ կարգավորմանը նպաստելու բոլոր ջանքերին։ ՉԺՀ-ն աջակցում է Ռուսաստանի և Ուկրաինայի կողմից ճանաչված միջազգային խաղաղության համաժողովի գումարմանը բոլոր կողմերի հավասար մասնակցությամբ և բոլոր խաղաղ տարբերակների արդար քննարկմամբ։ Մենք պատրաստ ենք պահպանել համագործակցությունը բոլոր կողմերի, այդ թվում՝ Գերմանիայի հետ»,- ասել է Սին, հաղորդում է «Սինհուա» գործակալությունը։