Այս ամբողջ գործընթացի առանցքային բաղադրիչը ռազմավարականից բացի, քարոզչական եւ հոգեբանական հարթությունն է: Այս մասին NEWS.am-ի հետ զրույցում նշեց տարածաշրջանային հարցերով փորձագետ Արմեն Պետրոսյանը՝ անդրադառնալով Իրան-Իսրայել հակամարտությանը:
«Այս երկու դերակատարների միջեւ տեւական հակամարտությունը արդեն մի քանի տասնամյակ է հիմնականում առարկայացվում է հենց այս հարթություններում: Սա առաջին դեպքն էր, երբ Իրանի կողմից ուղիղ թիրախավորվում է Իսրայելի տարածքը: Սրա տեղի ունենալն արդեն լրջագույնս ձեռքբերում է Իրանի համար: Դրանով փաստացի տարածաշրջանում ռազմավարական հավասարակշռություն է փոխվում՝ անկախ այդ գործողության արդյունքներից:
Միանշանակ է, որ Իսրայելի այս հաջողված դիմագրավումը տեղի ունեցավ առաջին հերթին իր դաշնակիցների ոչ միայն ռազմական, այլեւ քաղաքական, դիվանագիտական ջանքերի արդյունքում: Վերլուծաբանները նշում են, որ Իսրայելն ինքնուրույն չէր կարող դիմագրավել Իրանի հարձակմանը: Երկրորդ կարեւոր արձանագրումն այն է, որ Իսրայելի հետ կապված խնդիրներն Իրանը այլեւս Իսրայելի հետ չի բանակցում, չի քննարկում, այլ բանակցում է, քննարկում է, իր ուղերձները հասցնում է Իսրայելի դաշնակիցներին: Ասում է՝ եթե մեր ուզածով չլինի, մեր կարմիր գծերը խախտվեն, մենք գործելու ենք ինքնուրույն»,-ասաց Արմեն Պետրոսյանը:
Խոսելով կոնկրետ Իրանի իրականացրած գործողությունից, փորձագետը նկատեց, որ 330 հրթիռներից ընդամենը 10-ն է հատել Իսրայելի տարածքը. «Թիրախավորվել էին այն երկու ռազմաբազաները, որտեղից իրականացվել էր հարձակումը Դամասկոսում Իրանի հյուպատոսության վրա:
Իրանը սրանով ցույց է տալիս, որ աննախադեպ գործողություն տեղի ունեցավ: Իսրայելը ցույց է տալիս, որ իր ՀՕՊ համակարգը կարողանում է դիմագրավել ցանկացած մարտահրավերի»,-ընդգծեց նա: