Հայաստանում եւ Տավուշի մարզում որեւէ գյուղ չկա, որի վերաբերյալ քննարկվում է որեւէ մեկին հանձնելու հարցը: Այս մասին այսօր՝ մարտի 27-ին, ԱԺ-ում լրագրողների հետ զրույցում նշեց ԱԺ նախագահ Ալեն Սիմոնյանը՝ անդրադառնալով Տավուշի 4 գյուղերի տարածքներ Ադրբեջանին հանձնելու խնդրին:
«Մենք հիմա փնտրտուքի մեջ ենք այն մարդկանց, որոնք դա համարում են Հայաստանի տարածք: Ես ման եմ գալիս այն մարդկանց, որոնք կգան ու կապացուցեն, որ դրանք Հայաստանի տարածքում են: Հայաստանը կարող է իր տարածքը մետր առ մետր ցույց տալ բոլոր քարտեզներով, Խորհրդային Միության ստեղծումից սկսած վերջացրած Հայաստանի անկախանալով: Տավուշում ապրող բնակիչները գիտեն, որ այ էս գծից այն կողմ միշտ եղել է Հայաստան: Հայաստանի բոլոր իշխանությունները, Սերժ Սարգսյանը, ռոբերտ Քոչարյանը դա իմացել են եւ մենք բոլորս Վրաստան գնալուց միշտ տեսել ենք այդ ճանապարհը, այդ կտորը եւ անգամ կանգնում, ցույց էին տալիս, ասում էին՝ այ էստեղ արդեն Ադրբեջան է»,-ասաց նա:
Ալեն Սիմոնյանի խոսքով, ընդդիմությունը հերթական ֆալս-ստարտն է անում եւ փորձում է դրա վրա ինչ-որ բան գեներացնել. «Նախապես ասում եմ՝ չի ստացվելու: Հայաստանի տարածքի որեւէ մաս սակարկման առարկա ենթակա չէ»,-ասաց նա:
