Շաբաթ օրը Հնդկաստանի ռազմածովային ուժերը 35 սոմալեցի ծովահենների են հանձնել ոստիկանությանը Մումբայում՝ Կարմիր ծովի արևելքում 100 օր շարունակվող հակածովահենական գործողություններից հետո, որտեղ ծովահենությունը բռնկվել է մոտ մեկ տասնամյակի ընթացքում առաջին անգամ, հայտնում է Reuters-ը:
Հնդկաստանը, որը Ադենի ծոցում և հյուսիսային Արաբական ծովում ամենամեծ ազգային ուժն է, ծովահեններին գերի է վերցրել Ruen բեռնատար նավից անցյալ շաբաթ՝ երեք ամիս անց այն բանից հետո, երբ նավն առևանգվել էլ Սոմալիի ափերի մոտ:
Օգտվելով նրանից, որ արևմտյան ուժերն իրենց ուշադրությունը կենտրոնացրել են Կարմիր ծովում նավերը Եմենի հութիներից պաշտպանելու վրա, ծովահենները նոյեմբերից սկսած կատարել կամ փորձել են կատարել ավելի քան 20 առևանգում, ինչը հանգեցրել է ապահովագրության և անվտանգության ծախսերի բարձրացմանը և խորացրել համաշխարհային նավագնացության ընկերությունների առջև ծառացած ճգնաժամը, նշում է լրատվամիջոցը։
Ըստ հնդկական նավատորմի պաշտոնյաների, հութիների հարձակումների և ծովահենության աճի պատճառով տարածաշրջանով առևտրային փոխադրումները նոյեմբերից կրկնակի կրճատվել են, քանի որ նավերն ավելի երկար երթուղով են անցնում՝ շրջանցելով հարավային Աֆրիկան:
Հնդկական հատուկ նշանակության ջոկատայինների գերեվարած ծովահեններին սպառնում է ցմահ բանտարկություն, նրանք առաջինն են, որոնք քրեական պատասխանատվության կենթարկվեն Հնդկաստանի 2022 թվականի հակածովահենության օրենքի համաձայն, որը թույլ է տալիս ռազմածովային ուժերին ձերբակալել և կալանավորել ծովահեններին բաց ծովում:
Հնդկաստանն արձագանքել է 18 միջադեպի՝ իր 21 նավերով և 5000 անձնակազմով, և խուզարկել ավելի քան 1000 նավ, հայտնել է ՌԾՈՒ-ն:
