ԵՐԵՎԱՆ, 18 ՄԱՐՏԻ, ԱՐՄԵՆՊՐԵՍ: Գերմանիայի պաշտպանության նախարար Բորիս Պիստորիուսը հայտարարել է, որ Բեռլինը մտադիր է ակտիվացնել համագործակցությունը Տոկիոյի հետ պաշտպանության բնագավառում:

Ինչպես հաղորդում է «Արմենպրես»-ը, վկայակոչելով gazeta.ru-ին, նրա՝ Ճապոնացի գործընկեր Յասուկաձու Համադայի հետ բանակցությունների ընթացքում ասված խոսքերը հայտնում է Kyodo գործակալությունը։

Ըստ Պիստորիուսի՝ Ճապոնիան շրջապատված է պետություններով, որոնք նրան մարտահրավեր են նետում: Դա հաշվի առնելով՝ Գերմանիան մտադիր է զարգացնել համագործակցությունը Ճապոնիայի իշխանությունների հետ պաշտպանության և զորավարժությունների ոլորտում։

Համադան իր հերթին ընդգծել է, որ Ճապոնիայի իշխանություններն անվտանգության բնագավառում բարդ իրավիճակներում են հայտնվել, ինչի պատճառով կարիք ունեն համագործակցելու միջազգային հանրության հետ: 

Նախարարները պայմանավորվել են նաև հեշտացնել գերմանական զորքերի տեղակայումը Հնդկա-խաղաղօվկիանոսյան տարածաշրջանում և ակտիվացնել փոխանակումները երկու երկրների զինված ուժերի մակարդակով։