Երևանում՝ 11:07:36,   30 Հունվար 2023

ՀՀ արդարադատության նախարարն ու ԱՄՆ գործերի ժամանակավոր հավատարմատարը նախանշել են երկուստեք կարևորություն ներկայացնող առաջնահերթությունները

ՀՀ արդարադատության նախարարն ու ԱՄՆ գործերի ժամանակավոր 
հավատարմատարը նախանշել են երկուստեք կարևորություն ներկայացնող 
առաջնահերթությունները

ԵՐԵՎԱՆ, 24 ՀՈՒՆՎԱՐԻ, ԱՐՄԵՆՊՐԵՍ: Հայաստանի Հանրապետության արդարադատության նախարար Գրիգոր Մինասյանն ընդունել է ԱՄՆ գործերի ժամանակավոր հավատարմատար Չիփ Լեյթինենի գլխավորած պատվիրակությանը:

Ինչպես «Արմենպրես»-ին հայտնում են Արդարադատության նախարարությունից, Գրիգոր Մինասյանը բարձր է գնահատել ԱՄՆ դեսպանության, ԱՄՆ Միջազգային զարգացման գործակալության առաքելության և Արդարադատության նախարարության երկարամյա համագործակցությունը:

Նախարարն ընդգծել է հակակոռուպցիոն ոլորտում ԱՄՆ այնպիսի նախաձեռնությունների կարևորությունը, ինչպիսին 2022 թվականի դեկտեմբերին ԱՄՆ մայրաքաղաք Վաշինգտոնում տեղի ունեցած Հակակոռուպցիոն միջազգային համաժողովն է ու Հանուն Ժողովրդավարության գագաթնաժողովը։

Նախարարը ներկայացրել է կոռուպցիայի դեմ պայքարի շրջանակում իրականացված աշխատանքներն ու շնորհակալություն հայտնել Ներքին գործերի նախարարության և Պարեկային ծառայության կայացման գործում ԱՄՆ-ի ցուցաբերած ջանքերի համար: 

Հանդիպմանը Գրիգոր Մինասյանը ներկայացրել է նաև արդարադատության ոլորտում իրականացվող դատաիրավական բարեփոխումները, որի նպատակն է՝  դատական համակարգի անկախության, անկողմնակալության և դատական համակարգի նկատմամբ հասարակության վստահության բարձրացումը, դատարանների ծանրաբեռնվածության թեթևացումը, հանրային ծառայությունների մատուցման որակի բարելավումը, քաղաքացիական և քաղաքացիական դատավարության օրենսդրության բարելավումը, էլեկտրոնային արդարադատության միասնական կառավարման համակարգի ներդրումը և այլ քայլեր, որոնք էապես անհրաժեշտ են ՀՀ դատաիրավական համակարգի զարգացման համար: 

Չիփ Լեյթինենը կարևորել է արդարադատության ոլորտում իրականացվող բարեփոխումներն ու աջակցության պատրաստակամություն հայտնել:

Նախարարը բարձր է գնահատել ՀՀ հակակոռուպցիոն ռազմավարության և դրա իրականացման 2023-2026թթ. միջոցառումների ծրագրի մշակման գործընթացում ԱՄՆ ՄԶԳ ցուցաբերած մեծ աջակցությունը: 

Արդարադատության նախարարությունը հույս է հայտնել, որ ԱՄՆ ՄԶԳ-ն կցուցաբերի աջակցություն՝ հանրային կառավարման բարեփոխումների ոլորտի դոնորների համակարգման և փորձագետների ընտրության հարցում:

Երկուստեք կարևորվել են 2022 թվականին ԱՄՆ-ում ստորագրված՝ արդարադատության ոլորտին վերաբերող երկու համատեղ գործողությունների ծրագրերը, որոնք միտված են հակակոռուպցիոն և իրավապահ ոլորտների բարեփոխմանը:

Կողմերը նաև համոզմունք են հայտնել համագործակցության շարունակականության համար և նախանշել երկուստեք կարևորություն ներկայացնող առաջնահերթությունները:








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]