ԵՐԵՎԱՆ, 24 ՀՈՒՆՎԱՐԻ, ԱՐՄԵՆՊՐԵՍ: Իտալիայի ֆուտբոլի առաջնության 19-րդ տուրի շրջանակներում «Ինտեր»-ը հյուրընկալել էր «Էմպոլի»-ին:

«Արմենպրես»-ի հաղորդմամբ` առաջին կեսում թիմերն էլ պահեր ստեղծեցին, սակայն չկարողացան դրանք արդյունավետ եզրափակել, իսկ խաղակեսի վերջնամասում «Ինտեր»-ը մնաց 10 ֆուտբոլիստով. երկրորդ դեղի քարտի պատճառով հեռացվեց Միլան Շկրինյարը:

«Էմպոլի»-ն, ի վերջո, կարողացավ օգտագործել թվային առավելությունը և նվազագույն հաշվով հաղթանակ տոնել:

66-րդ րոպեին գոլի հեղինակ դարձավ Տոմազո Բալդանցը:

Հայաստանի ֆուտբոլի ազգային թիմի  նախկին կիսապաշտպան Հենրիխ Մխիթարյանը «Ինտեր»-ի մեկնարկային կազմում էր, սակայն փոխարինվեց 77-րդ րոպեին:

Այս տուրից հետո «Ինտեր»-ը Սերիա Ա-ի մրցաշարային աղյուսակում երրորդն է և ունի 37 միավոր: