ԵՐԵՎԱՆ, 10 ՀՈւՆՎԱՐԻ, ԱՐՄԵՆՊՐԵՍ: BigStory VC-ն 2022 թվականին 10 նոր ներդրում է կատարել հայկական ստարտափներում՝ նպատակ ունենալով Հայաստանում ավելացնել որակյալ ընկերությունների քանակը: 

Krisp ընկերության հիմնադիրներ Դավիթ Բաղդասարյանի, Արտավազդ Մինասյանի և Podcastle ընկերության հիմնադիր Արտավազդ Երիցյանի ստեղծած վենչուրային ֆոնդը ներդրումներ սկսել է անել 2022 թվականի մարտից:  

«Երազում էինք Հայաստանում Krisp-ի, Podcastle-ի նման ընկերություններ ավելի շատ տեսնել: BigStory-ն ստեղծելու գործում մեծ դեր ունեցավ մեր ներդրողներից մեկը: Մենք մտածում էինք, որ վենչուրային ֆոնդ ստեղծելու համար դեռ շուտ է, ժամանակ չէինք գտնում, բայց մեր ընկերն, ով շուտով մեր ներդրողը դարձավ, վստահ էր որ BigStory-ն ստեղծելու իսկական ժամանակն է: Նաև պատրաստակամություն հայտնեց մեծ գումար ներդնել»,- «Արմենպրես»-ի հետ զրույցում պատմեց BigStory-ի վենչուրային ֆոնդի և Krisp ընկերության համահիմնադիր, 10Web ընկերության հիմնադիր Արտավազդ Մինասյանը: 

Մինասյանի խոսքով՝ տարբեր հաջողակ տեխնոլոգիական ոլորտի բիզնես ընկերությունների ներկայացուցիչների հետ են խոսել, և շատերը պատրաստակամություն են հայտնել նախաձեռնության մի մասը դառնալ, որի արդյունքում էլ ստեղծվել է 10 միլիոն դոլար կապիտալով BigStory VC վենչուրային ֆոնդը: 

Ներդրումներ անում են հայ հիմնադիրների ստեղծած այն ընկերություններում, որոնք ստեղծում են արտադրանք գլոբալ շուկաների համար: Միջինում ներդնում են 100-300 հազար դոլար, բացառիկ դեպքերում նաև կես միլիոն դոլար նախասաղմնային, սաղմնային փուլում գտնվող ստարտափներում: 2022 թվականին հասցրել են 10 ներդրում անել: Ֆոնդի առաքելությունը հայկական ստարտափների հիմնադիրներին միջազգային ընկերություն ստեղծելու հարցում օգնելն է: 

«Գումար ներդնելուց առաջնորդվում ենք 3 չափանիշով: Կարևորում ենք թիմը, նախկինում ծավալած գործունեությունը, և այն հանգամանքը, թե ինչ փորձ ունեն տվյալ ոլորտում: Ուշադիր ենք նաև գաղափարին: Կարևոր է, որ գաղափարը ճիշտ ձևակերպված լինի, լուծի աշխարհում գոյություն ունեցող իրական խնդիր, լինի մասշտաբային: Պետք է ընդգծեմ նաև գաղափար-հիմնադիր համապատասխանության կարևորությունը: Կան որոշակի գաղափարներ, որոնք կարող են իրագործել միայն որոշակի մարդիկ»,- ասաց Մինասյանը:

Վենչուրային ֆոնդն առաջին ներդրումը ծրագրավորման գիտելիքներ տվող հայկական WildLearner ստարտափում է արել: Ֆոնդը ներդրում է արել Docus, Zoomerang, BlueQubit, Sleep Doctor, Prelaunch.com, WildLearner, ProdMap, Mythrill, Stylebit, B4 ստարտափներում: Ֆոնդի համահիմնադիրը վստահ է՝ 10 ստարտափներն էլ պատրաստ են օրուգիշեր աշխատել ցանկալի արդյունք ստանալու համար:

«Մեր ֆոնդի հիմնադիրները հիմնադիրների համար տիպի ֆոնդ է: Երեքս էլ  ձեռներեցության մեծ փորձ ունենք: Ստարտափներում, բացի ներդրումներ անելուց, կիսվում ենք նաև մեր փորձով, կապերով, փորձում ենք նաև օգնել արտադրանքը ճիշտ ներկայացնելու գործում, որպեսզի ֆինանսավորման հաջորդ փուլերն ավելի արագ ու ճիշտ կերպ ընթանան: Ի դեպ, մեր ընկերությունների մասնագետները հաճախ ներգրավվում են ստարտափներին օգնելու գործում, ինչը յուրահատուկ մոտեցում է»,- նշեց ֆոնդի համահիմնադիրը:

Մյուս վենչուրային ֆոնդերի հետ լավ հարաբերությունների մեջ են: Կան ստարտափներ, որտեղ ներդրում անելու համար այլ ֆոնդերի հետ քննարկումներ են ունենում: 

Մինասյանը նշեց՝ 2022 թվականը լավ տարի էր իրենց համար: Ներդրում կատարելու համար դիտարկում էին 60 ստարտափ: Վենչուրային  ֆոնդի համար կարևոր է մեծ քանակության ստարտափների հետ աշխատելը: 

«Վենչուրային շուկան այս պահին պատմական բացասական ռեկորդներ է գրանցում, ու շատ դժվար է լինելու նոր ֆինանսավորում ներգրավելը: Այդ առումով մեր ստարտափները 2023-ին շատ դժվարություններ են ունենալու ու հուսանք՝ այս իրավիճակը հաղթահարելի կլինի: 2023 թվականին սա ստարտափների ամենամեծ մարտահրավերն է լինելու»,- նշեց Մինասյանը: 

Նա հավելեց, որ 2023 թվականին նպատակ ունեն նոր տաղանդավոր հայ ձեռներեցների բացահայտել, ներդրում անել նրանց գաղափարներում:  

Կարինե Տերտերյան