ԵՐԵՎԱՆ, 3 ՀՈՒՆՎԱՐԻ, ԱՐՄԵՆՊՐԵՍ։ Synergy Armenia ընկերությունը ներկայացրել է 2022 թվականին կնքած նոր համագործակցություններն ու մշակած ծրագրերը. ընկերությունը 80-ից ավելի երկրներում գործընկերներ ունի։ «Արմենպրես»-ի հաղորդմամբ՝ այս մասին հայտնում է ընկերության հանրային կապերի և հաղորդակցության մասնագետ Լիլիթ Հարությունյանը: 

«Սիներջի»-ի ստեղծած թվային լուծումները շարունակում են կիրառվել աշխարհի տարբեր անկյուններում: Ուգանդայում, Զիմբաբվեում պաշտոնապես գործարկել է էլեկտրոնային արդարադատական նոր համակարգը: Զիմբաբվեում մշակվել է նաև Զարգացման նախագծերի կառավարման տեղեկատվական համակարգը և Հանրային ծառայության, աշխատանքի և սոցիալական ապահովության նախարարության համար ստեղծված ծրագիրը` ուղղված Ինտեգրացված սոցիալական զարգացմանը:

Հորդանանում Ներդրումների ազգային ռեգիստրն ավտոմատացրել է աշխատանքը, բարելավել տվյալների որակը և թափանցիկությունը, փաստաթղթերի կառավարումը: Նիգերիայում «Սիներջի»-ի ծրագիրն օգնում է բացահայտել բնակչության կարիքները և պետությունից աջակցություն ստանալ։ Եվս մեկ ծրագրով Նիգերիայում էրոզիայի և ջրբաժանների կառավարման նախագծով ավելի քան 3 միլիոն մարդ պայքարում է հեղեղներից առաջացող հողի էրոզիայի դեմ:

Կատարում ընկերության ստեղծած ծրագրերով կօգնեն գնահատել Շեյխա Մոզայի «Կրթությունը բոլորից վեր» հիմնադրամի կրթական ծրագրերի ազդեցությունը:

Անվտանգ խմելու ջրի, սանիտարական պայմանների և հիգիենայի պայմաններ ստեղծելու համար Զամբիայում ընկերության մշակած ավելի քան 800 ցուցիչ կօգնի սանիտարական նախագծին, որ աջակցեն մոտ 15 հազար ընտանիքի՝ նվազեցնելու հիգիենայի խնդիրներից առաջացող հիվանդությունների ռիսկը:

Save the Children-ի համար էլ ընկերության ստեղծած PRIME օնլայն հարթակն օգնում է աշխարհի 120-ից ավելի երկրում երեխաների կյանքն ավելի ապահով դարձնել:

Ընկերությունը նոր պայմանագրեր է կնքել Նիդեռլանդների, Իրաքի, Բելգիայի, Զիմբաբվեի, Իրաքյան Քուրդիստանի՝ արդեն հավատարիմ դարձած գործընկերների, ինչպես նաև Միացյալ Նահանգների հասարակական կազմակերպությունների հետ:

«Սիներջի»-ի տեղեկատվական համակարգերը կիրառվում են նաև Հայաստանում:

Արդեն գործում է էլեկտրաէներգետիկական մեծածախ շուկայի ազատականացմանը միտված Էլեկտրաէնեգիական շուկայի կառավարման ծրագիրը՝ առցանց առևտուր կազմակերպելու համար:

Կոռուպցիայի կանխարգելման հանձնաժողովի համար ստեղծած հայտարարագրման էլեկտրոնային նոր հարթակը կօգնի կոռուպցիայի կանխարգելման գործընթացին: Իսկ Պետեկամուտների կոմիտեն կավտոմատացնի վերահսկվող մաքսային հայտարարագրերի և ծանուցումների գործընթացները: Ստեղծվել է նաև էլեկտրոնային հարթակ ՄԻԵԴ-ի՝ Հայաստանի ներկայացուցչի գրասենյակի համար, որ թվայնացվեն կառույցում մեր երկրի հետ կապ ունեցող գործընթացները:

«Սիներջի»-ն նոր պայմանագրեր է կնքել ևս 8 երկրում: Արդարադատական համակարգերի թվայնացման նախագծեր կիրականացվեն Էսվատինիում, Ճամայկայում, Մոլդովայում, Սան Տոմե և Պրինսիպի կղզի-պետությունում:

Թվայնացման մյուս լուծումները հանրային ֆինանսների կառավարման ոլորտում են: Քենիայում ջրի ռեսուրսները ճիշտ օգտագործելու համար կթվայնացվեն ջրամատակարարման ծառայությունների գործընթացները: Սեյշելյան կղզիների կառավարության հետ կգործակցեն արտաքին օգնության կառավարման օնլայն համակարգ ստեղծելու համար: